ठाणे : विद्या प्रसारक मंडळ, ठाणे (व्हीपीएम) या प्रतिष्ठित शैक्षणिक संस्थेच्या ९० वर्षपूर्ती निमित्त ठाण्यात विशेष सांस्कृतिक कार्यक्रमाचे आयोजन करण्यात आले आहे. १९३५ मध्ये स्थापन झालेल्या या संस्थेने आजवर २ लाखांहून अधिक विद्यार्थ्यांना शिक्षणाचे संस्कार दिले असून मंडळाच्या विविध शाळा व महाविद्यालयांमध्ये दररोज सुमारे १७ हजार विद्यार्थी शिक्षण घेत आहेत.
व्हीपीएमच्या अखत्यारीत डॉ. बेडेकर विद्या मंदिर, जोशी-बेडेकर महाविद्यालय, बांदोडकर विज्ञान महाविद्यालय, विधी महाविद्यालय, व्यवस्थापन अभ्यास संस्था तसेच वेळणेश्वर व ठाणे येथील अभियांत्रिकी महाविद्यालयांचा समावेश आहे. लंडनमध्ये २००९ साली स्थापन केलेली व्हीपीएमची लंडन अकादमी ऑफ एज्युकेशन अँड रिसर्च ही त्यांची आंतरराष्ट्रीय कामगिरी ठरली आहे.
विद्या प्रसारक मंडळ, ठाणे (व्हीपीएम) या प्रतिष्ठित शैक्षणिक संस्थेच्या ९० वर्षांच्या गौरवपूर्ण प्रवासानिमित्त रविवार ३० नोव्हेंबर रोजी सायं. ५ ते रा. १० या वेळेत चेंदणी येथील कॉलेज कॅम्पसच्या टर्फवर विशेष सांस्कृतिक कार्यक्रमाचे आयोजन केले आहे.कार्यक्रमात श्री ओमकार दादरकर यांचे शास्त्रीय संगीत आणि पंडित राकेश चौरसिया यांचे बासरी वादन सादर होणार असून, शिक्षण व कला रसिकांनी या कार्यक्रमाला मोठ्या संख्येने उपस्थित राहावे, असे आवाहन मंडळाचे कार्याध्यक्ष डॉ. महेश बेडेकर यांनी केले आहे.
